Samgöngu- og sveitarstjórnarráðherra ber að leggja fram tillögu til þingsályktunar um stefnumótandi áætlun ríkisins um málefni sveitarfélaga fyrir Alþingi, að minnsta kosti á þriggja ára fresti til fimmtán ára í senn. Í stefnumótandi áætlun skal jafnframt mörkuð aðgerðaáætlun til næstu fimm ára. Ákvæði um gerð slíkrar áætlunar voru færð í 2. gr. sveitarstjórnarlaga, nr. 138/2011, með 10. gr. laga nr. 53/2018.

Stefnumótun ríkisins á þessu sviði er nýmæli og felur í sér að gerð verður langtímaáætlun í takt við aðra stefnumótun og áætlanagerð á verksviði samgöngu- og sveitarstjórnarráðuneytis, þ.e. samgönguáætlun, fjarskiptaáætlun og byggðaáætlun/sóknaráætlanir.

Sveitastjórnarlög mæla fyrir um að samráð skuli hafa við önnur ráðuneyti, sveitarfélög og Samband íslenskra sveitarfélaga við gerð stefnumótandi áætlunar um málefni sveitarfélaga. Þá skal haft samráð við hagsmunaaðila eftir þörfum. Einnig skal horfa til stefnumörkunar sem fram kemur í byggðaáætlun og sóknaráætlunum sem gerðar eru samkvæmt lögum um byggðaáætlun og sóknaráætlanir. Loks skal almenningi gefinn kostur á að koma að sjónarmiðum sínum og athugasemdum í opnu samráðsferli.

Reglugerðardrögin fela í sér ákvæði um markmið, samráð og annað verklag við undirbúning og gerð tillögu ráðherra að stefnumótandi áætlun ríkisins um málefni sveitarfélaga. Undirbúningurinn skal vera í höndum fjögurra manna starfshóps sem ráðherra skipar en þar af eru tveir fulltrúar Sambands íslenskra sveitarfélaga.

Frestur til að senda inn umsögn er til og með 13. desember nk.