Í nýsköpunarstefnu fyrir Ísland verða áherslur í nýsköpun hjá hinu opinbera kynntar. Opinberir vinnustaðir ná yfir starfsemi bæði ríkis og sveitarfélaga sem veita opinbera þjónustu til almennings og fyrirtækja. Opinber nýsköpun er skilgreind ný eða umtalsvert breytt aðferð til að bæta starfsemi og árangur á vinnustaðnum. Nýsköpunin þarf að fela í sér nýjungar fyrir vinnustaðinn en hún má hafa verið notuð annars staðar áður eða hafa verið þróuð af öðrum. Skilyrði fyrir að verkefni teljist nýsköpun er að það hafi skapað virði í gegnum aukin gæði í þjónustu, aukna skilvirkni vinnustaða, aukna þátttöku almennings, bætta starfsánægju eða aukið virði fyrir nærumhverfið. Nýsköpun hjá hinu opinbera getur líka haft töluverð áhrif á nýsköpun utan við starfsemi hins opinbera því oft eru nýsköpunarverkefni samstarfsverkefni hins opinbera og einkafyrirtækja. Það er því mikilvægt að hvetja til og stuðla að nýsköpun hjá opinberum vinnustöðum svo megi auka nýsköpun í landinu.

Í febrúar efndi fjármála- og efnahagsráðuneytið til vinnufundar með aðilum ríkis og sveitarfélaga um nýsköpun opinberra vinnustaða. Til fundarins voru saman komnir aðilar sem hafa með beinum hætti unnið að nýsköpunarverkefnum og hafa reynslu af því umhverfi sem opinberir aðilar vinna í. Afrakstur fundarins eru þau 10 áherslumál í nýsköpun hjá hinu opinbera sem nú eru lögð í samráð. Ýmsar leiðir eru til þess að vinna að þessum áherslumálum og verður fjallað um þær í nýsköpunarstefnu fyrir Ísland sem kemur út á næstu mánuðum.

Nánar má lesa um nýsköpun hjá hinu opinbera hér: https://www.stjornarradid.is/verkefni/rekstur-og-eignir-rikisins/opinber-nyskopun/