Lagt er til að í reglugerð verði heimilað að leita í VIS upplýsingakerfinu eftir fingraförum. Fingrafaraleit er afar nákvæm og myndi bæði auka skilvirkni sem og tryggja að upplýsingar um rétt auðkenni fáist úr VIS upplýsingakerfinu. Í ljósi fjölgunar umsækjenda um alþjóðlega vernd sem koma frá ríkjum sem gerð er krafa um vegabréfsáritun og umsækjenda sem eru án skilríkja, framvísa fölsuðum skilríkjum eða skilríkjum annars manns er talin full þörf á að fingrafaraleit fari fram í VIS upplýsingakerfinu svo auka megi líkur á því að unnt sé að bera rétt og staðfest kennsl á einstaklinga.