Samráð fyrirhugað 27.06.2019—08.08.2019
Til umsagnar 27.06.2019—08.08.2019
Niðurstöður í vinnslu frá 08.08.2019
Niðurstöður birtar

Drög að reglugerð um upplýsingagjöf um farþega og áhöfn

Mál nr. 153/2019 Birt: 27.06.2019 Síðast uppfært: 08.07.2019
  • Fjármála- og efnahagsráðuneytið
  • Drög að reglugerð
  • Málefnasvið:

Niðurstöður í vinnslu

Umsagnarfrestur er liðinn (27.06.2019–08.08.2019). Umsagnir voru birtar jafnóðum og þær bárust. Skoða umsagnir. Niðurstöður samráðsins verða birtar þegar unnið hefur verið úr þeim ábendingum og athugasemdum sem bárust.

Málsefni

Fjármála- og efnahagsráðuneytið birtir til umsagnar drög að nýrri reglugerð um upplýsingagjöf um farþega og áhöfn.

Fjármála- og efnahagsráðuneytið óskar eftir umsögnum um drög að nýrri reglugerð um upplýsingagjöf um farþega og áhöfn.

Samkvæmt 1. mgr. 51. gr. a. tollalaga nr. 88/2005 er fyrirtækjum sem annast flutning farþega og vöru til og frá landinu skylt að afhenda tollstjóra upplýsingar um farþega og áhöfn sem nýttar eru við tolleftirlit og til að koma í veg fyrir og rannsaka brot á lögum. Þá er tollstjóra, lögreglu og öðrum handhöfum lögregluvalds heimilt að skiptast á upplýsingunum í þágu eftirlits, greiningarstarfs eða vegna rannsókna á ætluðum brotum.

Í þessum drögum að reglugerð er nánar fjallað um upplýsingaskilin, upplýsingaskipti og meðhöndlun upplýsinganna.

Innsendar umsagnir

Afrita slóð á umsögn

#1 Icelandair Group hf. - 08.08.2019

Icelandair Group er almennt hlynnt því að lagareglur um miðlun upplýsinga til yfirvalda um farþega og áhöfn séu gerðar skýrari enda kann slíkt að vera nauðsynlegt í ákveðnum tilvikum vegna lagareglna um persónuvernd. Aftur á móti telur félagið að sú upplýsingamiðlun sem mælt er fyrir um í drögum að reglugerð þessari sé alltof víðtæk og ekki í samræmi við þær upplýsingar sem flugfélög safna um farþega sína sem myndi leiða til þess að ómögulegt er að verða við öllum þeim kröfum sem fram koma í reglugerðardrögunum.

Icelandair Group gerir sérstaklega athugasemdir við 5., 6., 7. og 12. tölul. reglugerðardraganna og leggur til að þeir töluliðir verði felldir út úr drögunum á þeim forsendum að ómögulegt sé að verða við beiðni yfirvalda um þær upplýsingar sem þar er mælt fyrir um. Til að mynda hafa flugfélög engar upplýsingar um heimilisfang ferðamanns eða farmiðakaupanda, skipulag ferðar eða upplýsingar um tengsl forráðamanna við börn undir 18 ára aldri eða hvaða ferðaskrifstofa heldur utan um bókun. Til viðbótar telur Icelandair Group að skýra þurfi betur hvað átt sé við með 14. og 16. tölul. reglugerðardraganna enda ekki víst að til staðar séu upplýsingar um sætisnúmer eða allan farangur ferðamanns.

Upplýsingasöfnun Icelandair og annarra flugfélaga um farþega og áhöfn byggir á alþjóðlegum staðli frá Alþjóðaflugmálastofnuninni (ICAO). Sú upplýsingamiðlun sem mælt er fyrir um í drögum að reglugerð þessari er ítarlegri en þær upplýsingar sem gert er ráð fyrir að safnað sé samkvæmt stöðlum ICAO. Það kynni því að verða íþyngjandi fyrir flugfélög sem fljúga til og frá Íslandi að þurfa að safna þeim upplýsingum sem hér er mælt fyrir um. Að Mati Icelandair Group er meðalhófs því ekki gætt með setningu reglugerðar þessarar og því nauðsynlegt að efni hennar verði tekið til gagngerrar endurskoðunar áður en hún nær fram að ganga.

Afrita slóð á umsögn

#2 Samtök atvinnulífsins - 08.08.2019

Góðan dag,

Meðfylgjandi er umsögn Samtaka atvinnulífsins um málið.

f.h. SA

Heiðrún Björk Gísladóttir

Viðhengi