Tímalína máls

1

Til umsagnar

  • 1.7.–21.8.2019

2

Í vinnslu

  • 22.8.2019–5.3.2020

3

Samráði lokið

  • 6.3.2020

Skjöl til samráðs

Mál nr. S-164/2019

Birt: 1.7.2019

Fjöldi umsagna: 7

Drög að reglugerð

Matvælaráðuneytið

Ferðaþjónusta

Reglugerð um gagnasöfnun og rannsóknir á sviði ferðamála

Niðurstöður

Drög að reglugerð um gagnaöflun og rannsóknir á sviði ferðamála voru birt á Samráðsgátt stjórnvalda 1. júlí 2019. Umsagnir og athugasemdir bárust frá fimm aðilum auk þess sem ráðuneytið fundaði með Ferðamálastofu um efni draganna . Við úrvinnslu voru allar ábendingar mátaðar við ákvæði reglugerðardraganna og metið hvort og þá hvernig hægt væri að taka tillit til þeirra út frá því markmiði með setningu reglugerðarinnar að festa í sessi á skýran hátt hlutverk Ferðamálastofu við gagnaöflun og úrvinnslu sem og framkvæmd rannsóknaáætlunar. Töluverðar breytingar urðu á drögunum í kjölfar samráðs.

Málsefni

Með reglugerðinni verður settur rammi um starfsemi Ferðamálastofu á sviði gagnaöflunar og rannsókna á sviði ferðamála, en stofnuninni var falið víðtækara hlutverk á því sviði við gildistöku laga um Ferðamálastofu, nr. 96/2018.

Nánari upplýsingar

Í lögum um Ferðamálastofu, nr. 96/2018, sem tóku gildi 1. janúar 2019, er stofnuninni falið að vinna að samræmingu, greiningum og rannsóknum í ferðaþjónustu með hliðsjón af stefnu stjórnvalda.

Meðal verkefna stofnunarinnar á þessu sviði skv. lögunum eru annars vegar öflun, miðlun og úrvinnsla upplýsinga, þar á meðal tölfræðilegra gagna og annarra upplýsinga um viðfangsefni stofnunarinnar og hins vegar greining á þörf fyrir rannsóknir sem m.a. nýtast við stefnumótun stjórnvalda, í samvinnu við atvinnugreinina og rannsóknastofnanir á sviði ferðaþjónustu.

Þá er í lögunum kveðið á um skyldu Ferðamálastofu til að safna gögnum sem nýtast við ákvarðanatöku og markmiðasetningu í ferðaþjónustu og birta þau. Stofnunin skal jafnframt stuðla að rannsóknum og greina þörf fyrir rannsóknir á sviði ferðamála og vinna rannsóknaráætlun í samstarfi við rannsóknastofnanir, háskóla og atvinnugreinina þar sem skilgreind er rannsóknarþörf og forgangsröðun verkefna.

Í lögunum er að finna heimild ráðherra til setningar reglugerðar þar sem kveðið er nánar á um söfnun og vinnslu upplýsinga og rannsóknir. Þeim drögum að reglugerð sem hér eru birt er ætlað að setja ramma um starfsemi Ferðamálastofu á sviði gagnaöflunar og rannsókna á sviði ferðamála.

Meginmarkmið með setningu reglugerðarinnar er að starfsemi Ferðamálastofu á sviði gagnaöflunar, tölfræði og rannsókna skuli miðast við að byggja upp samanburðarhæfan gagnabanka sem myndar tímalínu með hliðsjón af stefnu stjórnvalda og álagsmati innviða og nýtist við ákvarðanatöku og þróun greinarinnar. Í því skyni er annars vegar lagt til að þörf fyrir gagnaöflun verði greind í reglulegu samráði stjórnvalda og hagaðila og hins vegar að stýrihópur verði skipaður til að vinna rannsóknaáætlun.

Samráði lokið

Umsagnir voru birtar jafnóðum og þær bárust. Skoða umsagnir.

Umsjónaraðili

Hildur Kristjánsdóttir

hildur.kristjansdottir@anr.is