Í frumvarpinu eru lögð til ný heildarlög um skilameðferð lánastofnana og verðbréfafyrirtækja sem innleiða ákvæði tilskipunar 2014/59/ESB. Frumvarpið er yfirgripsmikið og er því skipt upp í 5 þætti þar sem fjallað er um ferli skilameðferðar frá fyrirbyggjandi aðgerðum og undirbúningi skilameðferðar til ákvörðunartöku og framkvæmd á sjálfri skilameðferðinni. Í frumvarpinu er kveðið á um einingu innan Seðlabanka Íslands sem nefnist Skilavald og fer með undirbúning og framkvæmd skilameðferðar og sérstakt fjármögnunarfyrirkomulag sem hægt er að nýta við skilameðferð og nefnist Skilasjóður.

Jafnframt eru lagðar til einstakar breytingar á lögum um fjármálafyrirtæki, nr. 161/2002, sem byggja að hluta til á efni tilskipunarinnar og að hluta á því að frumvarpið kveður á um nýja heildarlöggjöf sem leysir ákveðnar eldri reglur um sama efni af hólmi. Þar að auki eru lagðar til afmarkaðar breytingar á lögum um innstæðutryggingar og tryggingakerfi fyrir fjárfesta, nr. 98/1999, vegna innbyrðis tengsla þeirra við ákvæði frumvarpsins.