Með frumvarpinu er ætlunin að innleiða tilskipun (ESB) 2018/850, um breytingu á tilskipun 1999/31/EB um urðun úrgangs og tilskipun (ESB) 2018/851, um breytingu á tilskipun 2008/98/EB um úrgang, því í þeim eru settar fram nýjar og endurskoðaðar reglur um úrgangsstjórnun. Breytingarnar fela í sér innleiðingu á hringrásarhagkerfinu og er sérstök áhersla lögð á úrgangsforvarnir, framlengda framleiðendaábyrgð, heimilisúrgang, matarúrgang og að draga úr urðun úrgangs, einkum úrgangs sem hentar til endurvinnslu eða annarrar endurnýtingar.

Í ljósi framangreinds verða lagðar til breytingar á lögum um meðhöndlun úrgangs. Þær munu fela í sér tillögu að breyttu markmiðsákvæði laganna svo þau innifeli það markmið að skapa skilyrði fyrir myndun hringrásarhagkerfis. Þá verður lagt til að við stefnumörkun í málaflokknum verði skylt að nota efnahagsleg stjórntæki og aðrar ráðstafanir til að hvetja til þeirrar forgangsröðunar við meðhöndlun úrgangs sem kveðið er á um í lögunum. Einnig að almenna reglan um sérstaka söfnun verði gerð skýrari sem og að sérstök söfnun skuli fara fram á textílúrgangi, spilliefnum frá heimilum og lífrænum úrgangi. Jafnframt að skylt verði að flokka úrgang við niðurrif bygginga og aðra byggingarstarfsemi. Að auki verður lagt til að bannað verði að urða endurnýtanlegan úrgang og að sú skylda verði lögð á handhafa spilliefna, seljendur og miðlara að þeir skrái upplýsingar um spilliefni o.fl. í rafrænt skráningarkerfi.