Meðfylgjandi eru drög að frumvarpi til laga um félagslegan viðbótarstuðning við aldraða. Drögin eru samin í kjölfar skýrslu starfshóps um kjör aldraðra þar sem m.a.var greining á því hvaða hópar eldri borgara búa við lökust kjörin og lagt til sérstakt félagslegt úrræði er felur í sér aukinn stuðning við afmarkaðan hóp aldraðra. Byggja drögin á tillögu hópsins auk þess sem litið var til þeirra leiða sem gripið hefur verið til í nágrannalöndunum, einkum í Noregi, til að styrkja framfærslu þessa hóps. Í frumvarpsdrögunum er lagt til að komið verði á sérstökum félagslegum viðbótarstuðningi fyrir þann hóp aldraðra sem talinn er verst settur. Hér er aðallega um að ræða einstaklinga eldri en 67 ára sem búa og dvelja varanlega hér á landi en sem hafa áunnið sér lítil sem engin lífeyrisréttindi hér og sem hafa búið langdvölum erlendis án þess að ávinna sér lífeyrisréttindi þar. Lagt er til að viðbótarstuðningurinn komi til viðbótar heildartekjum viðkomandi þegar þær eru undir tilteknu viðmiði.