Sóknaráætlun Vesturlands 2020-2024 er þróunaráætlun landshlutans og felur í sér stöðumat hans, framtíðarsýn, markmið og áherslur til að ná fram þeirri framtíðarsýn. Sóknaráætlun Vesturlands byggir á fimm grunnþáttum; velferð, umhverfi, samgöngur, menning og atvinna. Þá voru allir þessir grunnþættir tengdir við heimsmarkmið Sameinuðu þjóðanna. Í áætluninni eru sett fram skýr mælanleg markmið og áherslur sem verða leiðarljós við val á áhersluverkefnum sem og við úthlutun úr Uppbyggingarsjóði Vesturlands.

Sóknaráætlun fyrir Vesturland var unnin á tímabilinu mars - október 2019. Haldið var fjölmennt íbúaþing þar sem Vestlendingum gafst kostur á að koma sínum sjónarmiðum á framfæri. Samráðsvettvangur Sóknaráætlunar Vesturlands kom síðan að frekari vinnu við mótun stefnunnar, en hann skipa fulltrúar frá sveitarfélögum, atvinnulífi, menningarlífi, fræðasamfélaginu, félagasamtökum og öðrum haghöfum.

Niðurstaða vinnunnar er framtíðarsýn, markmið og áherslur sem ætlað er að munu stuðla að frekari vexti og framgangi á Vesturlandi og gera landshlutann samkeppnishæfari og betri búsetukost. Það er von okkar að áætlunin gefi til kynna framsýni, athafnasemi, metnað, virðingu og samvinnu.