Með drögum þessum eru lagðar til breytingar á 16. gr. reglugerðar nr. 1017/2003, um skoðanir á skipum og búnaði þeirra, með síðari breytingum, að því er varðar eigin skoðanir skemmtibáta.

Skemmtibátar eru skoðaðir upphafsskoðun af Samgöngustofu fyrir skráningu þeirra á aðalskipaskrá. Samgöngustofa eða faggiltar skoðunarstofur framkvæma reglubundna aðalskoðun og árlega milliskoðun en eiganda skemmtibáts, sem er styttri en 15 metrar að skráningalengd, er heimilt að annast framkvæmd árlegra milliskoðana á eigin skemmtibát, sé skemmtibáturinn ekki notaður eða ætlaður til útleigu.

Í 4. mgr. 16. gr. segir að eigandi skemmtibáts sem annast sjálfur árlegar milliskoðanir á bát sínum skuli senda Samgöngustofu skoðunarskýrslu bátsins að skoðun lokinni, eigi síðar en að viku liðinni frá umræddri skoðun.

Með drögum þessum er lagt til að fallið verði frá því að eigandi skemmtibáts, sem sinnir sjálfur eigin milliskoðun, þurfi að senda Samgöngustofu skoðunarskýrslu. Ástæðan er sú að þar sem eigandi skemmtibáts tekur á sig ábyrgð á milliskoðun skemmtibáts er eðlilegt að hann beri einnig ábyrgð á varðveislu skoðunarskýrslna. Gildandi fyrirkomulag felur í sér tvöfalt eftirlit þar sem Samgöngustofa þarf að fara yfir innsendar skýrslur. Er því lagt til að hann varðveiti skýrsluna sjálfur og sé reiðubúinn til að framvísa henni ef skoðunarmaður óskar eftir því.