Tilefni áforma um breytingu á lögum nr. 48/2011 um verndar- og orkunýtingaráætlun eru að móta opinbera stefnu til framtíðar um hagnýtingu vindorku og leyfisveitingarferli vegna hennar.

Umhverfis- og auðlindaráðherra setti fyrr á árinu á fót starfshóp til að skoða málefni vindorku í ljósi áherslu í stefnuyfirlýsingu ríkisstjórnarinnar á nauðsyn lagasetningar um málaflokkinn. Í hópnum eiga sæti fulltrúar atvinnuvega- og nýsköpunarráðuneytisins, samgöngu- og sveitarstjórnarráðuneytisins og umhverfis- og auðlindaráðuneytisins. Meðal verkefna hópsins er að setja fram tillögur um hvernig ná megi sátt um hagnýtingu vindorku hér á landi og vinna að því búnu drög að nauðsynlegum breytingum á lögum nr. 48/2011, um verndar- og orkunýtingaráætlun (rammaáætlun).

Verkefni starfshópsins byggist á þeirri staðreynd að vindur er ekki jafn staðbundinn orkukostur og hefðbundnari orkukostir, enda hægt að hagnýta hann á flestum stöðum landsins. Þá krefst virkjun vindorku almennt styttri undirbúnings- og framkvæmdatíma en vatnsafls- eða jarðvarmavirkjanir. Á hinn bóginn er mikilvægt að móta opinbera stefnu um hvar megi og hvar megi ekki reisa vindorkumannvirki í því skyni að koma í veg fyrir að vindorkuver verði reist á svæðum sem ekki henta fyrir slíka starfsemi.

Markmið þeirra breytinga sem lagðar verða til á lögunum eru að málsmeðferð og meðhöndlun vindorku innan rammaáætlunar taki mið af sérstöðu vindorkunnar sem orkukosts. Gert er ráð fyrir að ákvörðun um staðsetningu vindorkuvera byggist á heildstæðu mati sem taki til umhverfis, samfélags og kerfislægra þátta. Þá er gert ráð fyrir að ferli vegna mats á virkjunarkosti og töku ákvarðana um leyfi verði markvissara, einfaldara og skjótara þar sem byggt verði á skýrri stefnumörkun um staðsetningu slíkrar starfsemi.