Árið 2018 skipaði dómsmálaráðherra vinnuhóp til þess að skrifa fyrstu skýrslu Íslands um framkvæmd samnings Sameinuðu þjóðanna um réttindi fatlaðs fólks. Fulltrúi félagsmálaráðuneytisins fer með formennsku í hópnum og leiðir vinnunna, en auk þess eiga sæti í hópnum fulltrúar frá dómsmálaráðuneytinu, samgöngu- og sveitarstjórnarráðuneytinu, mennta- og menningarmálaráðuneytinu, umhverfis- og auðlindaráðuneytinu og utanríkisráðuneytinu.

Vinnuhópurinn hefur leitast við að eiga víðtækt samráð við fatlað fólk og aðra hagsmunaaðila við undirbúning skýrslunnar. Fljótlega eftir að vinnan hófst komu fram fjölmargar ábendingar um þýðingu samnings Sameinuðu þjóðanna um réttindi fatlaðs fólks. Þar sem núverandi þýðing á samningnum þykir ekki í nógu góðu samræmi við frumtextann var ákveðið að uppfæra hana.

Nú liggur fyrir tillaga að nýrri þýðingu. Í skjalinu má sjá samanburð á frumtexta samningsins á ensku, núgildandi þýðingu, tillögur að breytingum og loks nýja textann í heild.

Óskað er eftir að athugasemdir við þýðinguna berist eigi síðar en 13. janúar 2020.