Árið 2018 var sett reglugerð um menntun, réttindi og skyldur heyrnarfræðinga og skilyrði til að hljóta starfsleyfi, nr. 630/2018. Vegna mistaka var haghöfum ekki kynnt að reglugerðardrögin væru í Samráðsgáttinni og því tók reglugerðin gildi án þess að umsögn bærist um drögin.

Í kjölfarið óskuðu nokkrir haghafar eftir því að reglugerðin væri endurskoðuð og setti ráðuneytið því af stað nýtt umsagnarferli um reglugerðina. Að fengnum umsögnum frá ýmsum haghöfum hefur ráðuneytið ákveðið að bæta við reglugerð nr. 630/2018 ákvæði til bráðabirgða sem gilda skal til 1. júní 2020. Í því verði kveðið á um að þeir sem eiga að baki menntun á sviði heilbrigðisvísinda og sem hafa aflað sér menntunar og þjálfunar og starfað tíu ár eða lengur undir handleiðslu tiltekins sérfræðings eigi rétt á starfsleyfi sem heyrnarfræðingur.