Atvinnuvega- og nýsköpunarráðuneytið óskar eftir umsögnum um drög að frumvarpi til laga til breytinga á lögum nr. 72/1994, um merkingar og upplýsingaskyldu varðandi vörur sem tengjast orkunotkun, með síðari breytingum.

Markmið frumvarpsins er að innleiða með tilhlýðilegum hætti reglugerð Evrópuþingsins og ráðsins (ESB) 1369/2017 frá 4. júlí 2017, um setningu ramma fyrir orkumerkingar og um niðurfellingu tilskipunar 2010/30/ESB. Alþingi staðfesti ákvörðun sameiginlegu EES-nefndarinnar nr. 72/2019 frá 29. mars 2020 þann 8. janúar 2020 og aflétti þar með stjórnskipulegum fyrirvara af hálfu Íslands.

Markmiðið með reglugerð Evrópuþingsins og ráðsins (ESB) 1369/2017 frá 4. júlí 2017, um setningu ramma fyrir orkumerkingar og um niðurfellingu tilskipunar 2010/30/ESB er að stuðla að notkun orkunýtnari vara.

Innleiðing reglugerðar (ESB) 1369/2017 hér á landi kallar því á nokkrar breytingar á lögum nr. 72/1994, um merkingar og upplýsingaskyldu varðandi vörur sem tengjast orkunotkun. Þannig er gildissvið laganna afmarkað við merkingu og upplýsingar um vörur með orkutengda notkun en er útvíkkað í reglugerðinni þannig það nái einnig yfir kerfi sem hafa áhrif á orkunotkun.

Skylda er sett á birgðasala um skrásetningu í miðlægan grunn upplýsingar um orkunotkun vara. Birgðasalar og innflytjendur á orkutengdum vörum sem bera orkumerkingar bera ábyrgð á að setja upplýsingar um vörur í vörugagnagrunninn ef þeir eru að flytja vörur á innri markað Evrópska efnahagssvæðisins. Upplýsingar skulu skráðar í vörugagnagrunninn áður en vörur eru settar á markað. Með vörugagnagrunninum verður auðveldara fyrir neytendur að finna og bera saman orkutengdar vörur. Seljendur sem þurfa nýjar orkumerkingar eða ný vöruupplýsingablöð geta sótt ný beint úr vörugagnagrunninum. Þá verður einfaldara fyrir eftirlitsstjórnvöld að haga markaðseftirliti vegna betri yfirsýnar yfir vörur á markaði. Birgðasalar geta einnig séð hvenær og hvort markaðseftirlitsstjórnvöld sækja tækniskjöl. Vörugagnagrunnurinn skal hvorki koma í staðinn fyrir né breyta ábyrgð markaðseftirlitsstjórnvalda. Vörugagnagrunnurinn er starfræktur og vistaður hjá Framkvæmdastjórn ESB.

Að öðru leyti felur frumvarpið almennt ekki í sér breytingar á efniskröfum um orkunýtingu vara sem nota orku.

Eftirlit með lögunum hefur verið á hendi Mannvirkjastofnunar, sem heitir frá 1. janúar 2020 Húsnæðis- og mannvirkjastofnun, og er það endurspeglað í frumvarpinu.

Umsögnum skal skilað eigi síðar en 11. febrúar 2020 í samráðsgátt.