Atvinnuvega- og nýsköpunarráðuneytið kynnir til umsagnar drög að frumvarpi til laga um innleiðingu á reglugerð (ESB) 2018/302 um ráðstafanir gegn óréttmætum landfræðilegum takmörkunum á netumferð og annarri mismunun sem byggist á því hvert þjóðerni viðskiptavinar er, hvar hann er búsettur eða hvar hann hefur staðfestu á innri markaðnum. Lagt er til að reglugerðin verði tekin upp í landsrétt með setningu sérlaga.

Í reglugerðinni er kveðið á um það að seljendum sé almennt óheimilt að loka fyrir eða takmarka aðgang viðskiptavina að vefsíðum seljenda með vísan til þjóðernis, búsetu eða staðfestulandi hans. Einnig að óheimilt verði að áframsenda viðskiptavin á aðra vefsíðu í öðru landi á sama grundvelli nema samkvæmt skýru samþykki viðskiptavinar. Þá er einnig kveðið á um að óheimilt sé að mismuna viðskiptavinum varðandi greiðslumáta á grundvelli þjóðernis eða búsetu. Í reglugerðinni er einnig kveðið á um undanþágur frá efnisreglum hennar sem byggja á málefnalegum ástæðum, svo sem ef landslög kveða á um skyldur seljenda sem fara annars gegn ákvæðum reglugerðarinnar. Þá kemur gerðin ekki í veg fyrir að seljendur viðhafi ákveðna markaðssókn á ákveðnum svæðum og seljendur verða ekki skyldaðir til að selja eða afhenda vöru eða þjónustu á svæðum sem þeir selja almennt ekki til.