Breyting þessi á reglugerðinni snýr að 3. gr. reglugerðar nr. 1221/2012 vegna nýrrar námsleiðar sem Háskólinn á Akureyri býður upp á fyrir nemendur í iðjuþjálfun, þ.e. að þeir geti valið leið sem lýkur með 180 ECTS-eininga BS-prófi auk 60 ECTS-eininga sem er diplómanám á meistarastigi. Nú á vordögum 2020 eru fyrstu nemarnir að ljúka þessari námsleið. Námsleiðirnar tvær, þ.e. þessi og fjögurra ára BS-prófið sem inniheldur 240 ECTS-einingar, munu skarast þannig að tveir hópar verða útskrifaðir.

Óvíst er hvort breytingin geti haft þau áhrif að þeir sem útskrifast úr þessu námi fái ekki viðurkenningu starfsréttinda milli EES-ríkja þar sem námsleiðin er ekki í samræmi við Bologna-samkomulagið um lengd námstíma sem gerir kröfu um þriggja ára grunnnám og tveggja ára meistaranám eða fjögurra ára BS/BA-nám.

Námsleiðin er byggð þannig upp að BS-námið er þriggja ára 180 ECTS-eininga nám. Nemendur geta ekki sótt um starfsleyfi, en þeir sem ljúka námsleiðinni með ákveðinni lágmarkseinkun geta sótt um diplómanám í iðjuþjálfun sem er 60 ECTS-eininga starfsréttindanám á meistarastigi.