Mennta- og menningarmálaráðuneyti kynnir drög að reglugerð um viðurkenningu á faglegri menntun og hæfi til starfa hér á landi sem hefur stoð í lögum um viðurkenningu á faglegri menntun og hæfi nr. 26/2010, sem breytt var með lögum nr. 16/2020.

Reglugerðin kemur í stað reglugerðar um sama efni nr. 879/2010 og eru með henni innleidd ákvæði tilskipunar 2013/55/ESB um viðurkenningu á faglegri menntun og hæfi, einkum hvað varðar evrópskt fagskírteini.

Í reglugerðinni er fjallað ítarlega um rafrænar umsóknir um evrópsk fagskírteini, afgreiðslufresti, skil á gögnum og málsmeðferð. Einnig er fjallað um viðurkenningu er veitir takmarkaðan aðgang að störfum, uppbótarráðstafanir, viðurkenningu starfsþjálfunartíma utan heimalands og nauðsynlega tungumálakunnáttu til faglegra starfa.

Auk þessarar reglugerðar mun heilbrigðisráðuneyti birta reglugerð er snýr sérstaklega að störfum heilbrigðisstarfsfólks og atvinnuvega- og nýsköpunarráðuneyti mun birta reglugerð er snýr að viðurkenningu til starfa í löggiltum iðngreinum.