Könnunin snýr að þjónustu, eftirliti og framfylgd regluverks hjá ráðuneytinu og eftirfarandi stofnunum:

- Samgöngustofu

- Þjóðskrá Íslands

- Byggðastofnun

- Póst- og fjarskiptastofnun

- Vegagerðinni

- Rannsóknarnefnd samgönguslysa

Markmiðið er að greina hvort og hvar lagðar eru óþarfar, flóknar eða óljósar byrðar á einstaklinga, fyrirtæki eða félagasamtök sem leita þurfa til ráðuneytisins eða stofnana þess.

Verkefnið er eitt af stefnumálum samgöngu- og sveitarstjórnarráðherra og í samræmi við stefnuyfirlýsingu ríkisstjórnarinnar um að gera átak í einföldun regluverks í þágu atvinnulífs og almennings.

Með könnun um þjónustu, eftirlit eða framfylgd regluverks ráðuneytis og stofnana var leitað eftir ábendingum frá fólki, fyrirtækjum og stofnunum um það sem betur mætti fara í starfi eða regluverki hjá ráðuneytinu og fagstofnunum. Rúmlega 50 ábendingar bárust og hefur þegar verið unnið úr ábendingum bæði í stofnunum og ráðuneytinu í samræmi við aðgerðaáætlun þar að lútandi.