Í 8. gr. a. laga um siglingavernd nr. 50/2004 er ákvæði um aðgang aðila að upplýsingum og haftasvæðum á höfnum og hafnaraðstöðum, svokallaðar bakgrunnsathuganir. Í ákvæðinu er kveðið á um að ráðherra skuli setja í reglugerð ákvæði um bakgrunnsathuganir lögreglu, svo sem varðandi beiðni um bakgrunnsathugun og framkvæmd hennar, umfang, upplýsingaöflun, efnislega skoðun upplýsinga, mat á öryggishæfi, áhrif afbrota og tímafresti í tengslum við þau, fíkniefnapróf, eyðublað, neikvæðar umsagnir, endurtekningu bakgrunnsathugana, skráningu umsagna lögreglu og eftirlit með einstaklingum í málaskrá lögreglu sem hafa hlotið jákvæða umsögn auk afturköllunar jákvæðrar umsagnar. Meðfylgjandi eru drög að slíkri reglugerð.

Reglugerðardrögin eru byggð á sambærilegum ákvæðum sem eru í V. kafla reglugerðar um flugvernd nr. 750/2016. Í reglugerðinni eru meðal annars ákvæði um hvernig skuli standa að beiðni um bakgrunnsathugun og hvernig lögregla eigi að framkvæma bakgrunnsathugun og meta afbrotaferil.