Þann 26. júní sl. var frumvarp til breytinga á lögum um heilbrigðisþjónustu nr. 40/2007 samþykkt á Alþingi. Var því frumvarpi m.a. ætlað að samræma lög um heilbrigðisþjónustu samþykktri heilbrigðisstefnu til ársins 2030. Með setningu einnar reglugerðar um hlutverk, starfsemi og þjónustu heilsugæslustöðva, heilbrigðisstofnana heilbrigðisumdæma og sjúkrahúsa landsins er ætlunin auðvelda aðgengi að þeim reglum sem um þær gilda. Þá yrði með setningu nýrrar reglugerðar felld brott gildandi reglugerð um heilsugæslustöðvar nr. 787/2007 og er breytingum á kafla reglugerðarinnar um heilsugæslustöðvar ætlað að ná betur utan um verkefni heilsugæslustöðva og færa orðalag og áherslur í nútímalegra horf. Ákvæði í kafla reglugerðarinnar um Landspítala og Sjúkrahúsið á Akureyri eru að mestu leyti tekin upp úr lögum um heilbrigðisþjónustu. Með fyrrgreindu frumvarpi til breytinga á lögum um heilbrigðisþjónustu voru ákvæði laganna um fyrrgreindar stofnanir stytt og ákveðið að þau ættu fremur heima í reglugerð. Að lokum er rétt að taka fram að reglugerðin miðar einnig að því að innleiða áherslur í samþykktri heilbrigðisstefnu til ársins 2030.