Í sáttmála ríkisstjórnarinnar kemur fram að átak verði gert í einföldun regluverks í þágu atvinnulífs og almennings og áhersla lögð á skilvirka og réttláta stjórnsýslu. Frumvarp þetta er liður í vinnu atvinnuvega- og nýsköpunarráðuneytisins á málefnasviði sjávarútvegs- og landbúnaðarráðherra um einföldun regluverks og stjórnsýslu. Í frumvarpinu er meðal annars lagt til að starfsumhverfi í fiskeldi verði einfaldað, sérstaklega fyrir minni framleiðendur. Þá eru lagðar til breytingar á regluverki um innflutning dýra sem miða að því að auka skilvirkni stjórnsýslu og einfalda ferla gagnvart umsækjendum. Einnig eru lagðar til breytingar á ýmsum lögum á málefnasviði sjávarútvegs- og landbúnaðarráðherra sem miða að því að auka skilvirkni stjórnsýslu og skýra regluverk, til hagsbóta fyrir atvinnulíf og samfélag.