Um reikisímtöl í farsíma gildir sú meginregla að engin reikigjöld eru lögð á símanotkun sem á sér stað á venjulegum ferðalögum innan EES (e. roam like home). Fjarskiptafyrirtæki geta samkvæmt EES-reglum lagt álag á einingarverð reikisímtala vegna þeirra símtala sem eru umfram eðlilega notkun (e. fair use policy). Árlega ákvarðar framkvæmdastjórn ESB hámark slíkrar álagningar (hámarksálag), á nánar skilgreindum reikniforsendum og að fenginni umsögn frá evrópskum hópi eftirlitsaðila á sviði fjarskipta (BEREC).

Samkvæmt framkvæmdarreglugerð framkvæmdastjórnarinnar (ESB) 2020/2082 frá 14. desember 2020, um vegið meðaltal hæsta verðs fyrir lúkningu símtala í farsíma í Sambandinu og um niðurfellingu á framkvæmdarreglugerð (ESB) 2019/2116, skal hámarksálag fyrir árið 2021 á einingarverð reikisímtala vegna símtala sem eru umfram eðlilega notkun vera 0,0076 evrur fyrir hverja mínútu (lækkun um 0,0003 evrur frá fyrra ári).

Fyrirhuguð er upptaka framkvæmdarreglugerðarinnar í EES-samninginn og í drögum þessum að reglugerð, um breytingu á reglugerð nr. 1174/2012 um alþjóðlegt reiki á almennum farsímanetum innan Evrópska efnahagssvæðisins m.áo.br., lagt til að hún verði innleidd í landsrétt. Lagt er til að felldar verði úr gildi fyrri breytingareglugerðir sama efnis.