Mennta- og menningarmálaráðuneyti hyggst lögfesta heimild til að endurnýja vottorð, t.d. starfsmanna menntastofnana. Í dag er eingöngu heimild til að afla upplýsinga úr sakaskrá við ráðningu. Með lagabreytingunni er stefnt að því að stuðla að auknu öryggi barna og ungmenna með því að fá vinnuveitendum heimild til að kalla eftir upplýsingum eftir að ráðningarsamband hefst. Um er að ræða tillögu sem barst frá Sambandi íslenskra sveitarfélaga. Markmið fyrirhugaðra breytinga er að vernda börn og ungmenni með því að tryggja skýra lagaheimild um að heimilt sé að afla sakavottorðs eftir að ráðningasamband hefst. Með því er komið í veg fyrir að það fari fram hjá vinnuveitanda ef starfsmaður brýtur af sér eftir að hann hefur störf.