Atvinnuvega- og nýsköpunarráðuneytið kynnir til samráðs drög að reglugerð um Ferðatryggingasjóð. Samhliða reglugerðinni eru einnig til samráðs drög að frumvarpi til laga um breytingu á lögum um pakkaferðir og samtengda ferðatilhögun, nr. 95/2018, sem felur í sér lagagrundvöll fyrir stofnun Ferðatryggingasjóðs.

Reglugerð um Ferðatryggingasjóð mun koma í stað reglugerðar um tryggingar vegna pakkaferða og samtengdrar ferðatilhögunar, nr. 150/2019. Í reglugerðinni er kveðið á um bókhald og reikningsskil ferðaskrifstofa, árlega upplýsingaskyldu þeirra, skylduaðild að Ferðatryggingasjóði og um útreikning á fjárhæð trygginga og iðgjalda til Ferðatryggingasjóðs.

Með reglugerðinni og stofnun Ferðatryggingasjóðs verða miklar breytingar á tryggingakerfi fyrir pakkaferðir. Hið nýja fyrirkomulag felur í sér sameiginlegan tryggingasjóð sem fjármagnaður verður af tryggingaskyldum aðilum. Sjóðurinn tryggir fullar endurgreiðslur til ferðamanna komi til ógjaldfærni eða gjaldþrots seljenda pakkaferða.