Frumvarpið má m.a. rekja til nýsköpunarstefnu stjórnvalda fyrir Ísland sem markar sýn til ársins 2030. Lagt er til að ákvæði tekjuskattslaga um skattlagningu á kauprétti hlutabréfa verði rýmkuð, heimilt verði að fresta um tvenn áramót hagnaði lögaðila vegna breytanlegra skuldabréfa, hagnaður vegna viðskipta með hlutabréf sem skipt hefur verið fyrir hlutabréf í öðru félagi teljist ekki til skattskyldra fjármagnstekna fyrr en hlutabréfin eru seld. Þá er lagt til að við ákvæði laga um staðgreiðslu skatts á fjármagnstekjur verði kveðið á um að kaupfélög og önnur samvinnufélög verði undanþegin staðgreiðslu fjármagnstekjuskatts vegna fjárhæðar arðs sem þau hafa fengið úthlutaða eða greidda frá ákveðnum félögum samkvæmt lögum um tekjuskatt. Jafnframt eru lagðar til breytingar á 262. gr. almennra hegningarlaga þar sem nauðsynlegt er talið að vísun til hegningarlaga í ákvæðum skattalaga sé jafnframt tekin upp sem verknaðarlýsing í 262. gr. laganna í þeim tilfellum þegar um stórfelld brot er að ræða. Enn fremur er lagt til að tekið verði gjald fyrir útgáfu könnunarvottorðs er snúa að viðurkenningu á hjónavígslu sem framkvæmd er erlendis og vafi leikur á hvort uppfyllt eru skilyrði fyrir skráningu hjónavígslunnar. Þrjár breytingar eru lagðar til á lögum um yfirskattanefnd. Í fyrsta lagi eru lagðar til breytingar á þeim fjölda nefndarmanna sem skipaðir eru til að sitja í yfirskattanefnd. Í öðru lagi er lagt til að lögfesta starfsreglur yfirskattanefndar um forsendur fyrir ákvörðun málskostnaðar úr ríkissjóði. Í þriðja lagi er lögð til breyting á lögunum varðandi endurákvörðun vegna kæru með þeim hætti að ákvæðið einskorðist ekki við ákvarðanir ríkisskattstjóra heldur taki einnig til ákvarðana annarra stjórnvalda.