Með lögum nr. 102/2020 var gerð breyting á 109. gr. laga um ársreikninga á þann veg að ársreikningaskrá skuli birta gögn sem skilaskyld eru á opinberu vefsvæði. Í framhaldi var kveðið á um að ráðherra seti með reglugerð ákvæði um gjaldtöku fyrir annars konar afhendingu gagna. Í greinargerð með frumvarpinu sem varð að lögum nr. 102/2020 segir m.a. að ákvæðið mæli fyrir um gjaldfrjálsan aðgang almennings að ársreikningum allra félaga á opinberu vefsvæði. Þannig verði rafræn uppfletting einstakra ársreikninga á opinberu vefsvæði án gjaldtöku en ársreikningaskrá verður áfram heimilt að innheimta gjald fyrir afhendingu ársreikninga á pappír eða öðru sértæku formi. Hér eru lögð fram drög að reglugerð um gjald fyrir afhendingu gagna hjá ársreikningaskrá á pappír eða á öðru sértæku formi og er m.a. gert ráð fyrir möguleika á að vera með tengingu í lokuðu uppflettikerfi, vefþjónustu, vefgátt eða sambærilegu viðmóti.