Mennta- og menningarmálaráðuneyti kynnir til umsagna drög að reglugerð um feril umsókna um þátttöku Íslands í samtökum um evrópska rannsóknarinnviði (ERIC). Reglugerðin er sett með stoð í 5. gr. laga nr. 66/2019 um samtök um evrópska rannsóknarinnviði (ERIC). Samtök um evrópska rannsóknarinnviði (e. European Research Infrastructure Consortium, ERIC) er samstarfsform um rekstur á umfangsmiklum og kostnaðarsömum rannsóknarinnviðum í Evrópu, en aðilar að ERIC-samtökum eru ríki ESB og EFTA. Samtök um evrópska rannsóknarinnviði (ERIC) eru stofnuð um rannsóknarinnviði sem eru af þeirri stærðargráðu að ekkert eitt ríki hefur bolmagn til þess að reka þá. Þær kröfur eru gerðar til ERIC rannsóknarinnviða að þeir séu nauðsynlegir við framkvæmd evrópskra rannsóknaráætlana, styrki evrópska rannsóknasvæðið (e. European Research Area, ERA), styrki viðkomandi fræðasvið faglega og tæknilega á alþjóðlegan mælikvarða, séu opnir vísindamönnum frá ESB og tengdum ríkjum, hvetji til hreyfanleika vísindamanna og þekkingar innan evrópska rannsóknasvæðisins og stuðli að miðlun og nýtingu niðurstaðna og tækniframfara.