Með reglugerð um fjárhagslegar viðmiðanir, nr. 162/2021, var ýmsum undirgerðum reglugerðar (ESB) 2016/1011 um fjárhagslegar viðmiðanir veitt gildi hér á landi. Evrópusambandið hefur nú samþykkt fjórar undirgerðir í viðbót sem unnið er að því að taka upp í EES-samninginn og til stendur að veita gildi hér á landi með breytingu á reglugerð 162/2021 samhliða upptöku í samninginn. Efni gerðanna er eftirfarandi:

1. Framseld reglugerð framkvæmdastjórnarinnar (ESB) 2020/1816: Gerðin útfærir fyrirmæli reglugerðar (ESB) 2016/1011 um upplýsingagjöf stjórnenda viðmiðana um umhverfi, félagslega þætti og stjórnarhætti og staðalsniðmát.

2. Framseld reglugerð framkvæmdastjórnarinnar (ESB) 2020/1817: Gerðir útfærir fyrirmæli reglugerðar (ESB) 2016/1011 um lágmarksinnihald útskýringar á því hvernig lykilþættir aðferðafræði endurspegli þætti varðandi umhverfi, félagslega þætti og stjórnarhætti fyrir hverja viðmiðun eða fjölskyldu viðmiðana og staðlað snið sem skal nota.

3. Framseld reglugerð framkvæmdastjórnarinnar (ESB) 2020/1818: Gerðin útfærir fyrirmæli reglugerðar (ESB) 2016/1011 um lágmarkskröfur um samræmingu aðferðafræði viðmiðana ESB vegna loftslagstengdra umbreytinga og viðmiðana ESB sem eru lagaðar að Parísarsamningnum.

4. Framkvæmdarreglugerð framkvæmdastjórnarinnar (ESB) 2021/1122: Reglugerðin bætir viðmiðun fyrir millibankavexti í Noregi (NIBOR) við lista yfir mjög mikilvægar viðmiðanir samkvæmt framkvæmdarreglugerð (ESB) 2016/1368 og fellir viðmiðun fyrir millibankavexti í London (LIBOR) af listanum.