Með lögum nr. 71/2021, sem breyttu lögum nr. 71/2008, um fiskeldi, var ráðherra fengin heimild til að kveða á um í reglugerð að starfsræksla fiskeldisstöðva á landi, þar sem hámarkslífmassi er allt að 20 tonnum á hverjum tíma og starfrækslan er ekki háð mati á umhverfisáhrifum samkvæmt ákvörðun Skipulagsstofnunar, sé háð skráningarskyldu í stað útgáfu rekstrarleyfis. Drögin byggja á framangreindum lögum.

Í þeim drögum sem hér eru kynnt er kveðið á um að reglugerðin nái til fiskeldisstöðva þar sem hámarkslífmassi í matfiska- og rannsóknareldi fer ekki yfir 20 tonn á hverjum tíma og hámarkslífmassi í seiðaeldi fer ekki yfir 1.000 kg. eða 10.000 seiði á hverjum tíma. Um er að ræða nánari útfærslu á 20 tonna mörkunum sem kveðið er á í framangreindum lögum. Kveðið er á um að Matvælastofnun fari í úttekt áður en starfsemi hefst þar sem frjór lax eða laxaseiði verða alin. Ekki er talin ástæða til þess að Matvælastofnun fari í úttekt hjá öðrum skráningarskyldum aðilum. Þá er kveðið á um áhættumiðað eftirlit Matvælastofnunar. Samkvæmt reglugerðardrögunum er dregið úr skýrsluskilum skráningarskyldra aðila en í stað þess að skila mánaðarlega framleiðsluskýrslum til Matvælastofnunar, líkt og kveðið er á um í reglugerð nr. 540/2020, um fiskeldi, skila skráningarskyldir aðilar skýrslunum tvisvar sinnum á ári.

Jafnframt eru kynnt til samráðs drög að breytingu á reglugerð nr. 540/2020, um fiskeldi. Lagðar eru til breytingar á gildissviðsákvæði reglugerðarinnar m.t.t. reglugerðar um skráningarskylda aðila í fiskeldi.