Atvinnuvega- og nýsköpunarráðuneytið kynnir til samráðs drög að breytingu á 2. mgr. 8. gr. gjaldskrár Matvælastofnunar fyrir eftirlit og aðra gjaldskylda starfsemi Matvælastofnunar, nr. 220/2018. Breytingarnar eru lagðar til í samræmi við nýsamþykkta reglugerð um skráningarskylda aðila í fiskeldi, nr. 1133/2021. Reglugerðin mælir fyrir um að fiskeldisstöðvar þar sem hámarkslífmassi í matfiska- og rannsóknareldi fer ekki yfir 20 tonn á hverjum tíma og hámarkslífmassi í seiðaeldi fer ekki yfir 1.000 kg. eða 10.000 seiði á hverjum tíma séu skráningarskyldar hjá Matvælastofnun. Áður voru slíkar fiskeldisstöðvar háðar rekstrarleyfi. Eru því lagðar til breytingar á gjaldskrá Matvælastofnunar þannig að unnt verði að innheimta gjald fyrir skráningu fiskeldisstöðvar, úttektar vegna skráningar og vinnu sem tengist breytingu á skráningu.