Sjávarútvegs- og landbúnaðarráðherra birtir til umsagnar drög að frumvarpi til laga um breytingu á lögum um matvæli og lögum um eftirlit með fóðri, áburði og sáðvöru til innleiðingar á reglugerð Evrópuþingsins og ráðsins (ESB) 2018/848 um lífræna framleiðslu og merkingu lífrænna vara.

Með frumvarpinu er lagt til að lög um lífræna landbúnaðarframleiðslu verði felld brott í heild sinni og ákvæði er varða lífræna framleiðslu verði felld inn í matvæla- og fóðurlöggjöfina.

Meginmarkmið frumvarpsins er að innleiða í íslenskan rétt reglugerð (ESB) 2018/848 um lífræna framleiðslu en um er að ræða nýja reglugerð sem leysa af hólmi eldri reglur sem innleiddar voru í íslenska löggjöf.

Frumvarpið felur í sér tillögur að efnisbreytingum á gildandi rétti sem nauðsynlegar þykja til innleiðingar en miðar jafnframt að því að einfalda regluverkið.