Hið opinbera hefur síðustu ár boðið upp á aukna þjónustu með rafrænum máta, þ.á m. innan heilbrigðiskerfisins. Má þar helst nefna Heilsuveru en þar inni geta einstaklingar m.a. bókað tíma, endurnýjað lyfjaávísanir, opnað myndsamtal (fjarheilbrigðisþjónusta), séð framkvæmd bólusetninga, sótt vottorð (þ.m.t. vegna Covid) og átt örugg rafræn samskipti við heilbrigðisstarfsmenn.

Í dag eru hvorki aðstandendur né aðrir utan heilbrigðisstarfsfólks, með heimild til að aðstoða einstaklinga sem ekki geta notast við hefðbundin rafræn skilríki og þurfa á aðstoð annarra að halda við umsýslu sinna mála. Frumvarp þetta til breytinga á lögum um sjúkraskrár nr. 55/2009 felur í sér heimild til handa sérfræðilæknum til að veita þriðja aðila umsýsluumboð fyrir hönd einstaklings 16 ára og eldri sem er ófær um að veita slíkt umboð sjálfur vegna andlegra og/eða líkamlegra skerðinga.

Umsýsluumboð veitir aðgang að heilbrigðisgáttum t.d. Heilsuveru og öðrum slíkum rafrænum lausnum innan heilbrigðiskerfisins og opinberra stofnanna sem uppfylla skilyrðin sem sett verða í reglugerð á grundvelli þessarar heimildar. Með þessu mun öll umsýsla fyrir hönd annarra vera skráð og rekjanleg.

Aðgangur umboðshafa umsýsluumboða verður takmarkaður við ákveðnar aðgerðir innan heilbrigðisgátta, s.s. lyfjaendurnýjanir, tímabókanir, vottorð vegna t.d. Covid, örugg rafræn samskipti við heilbrigðisstarfsmann, opnun myndsamtals, yfirlit yfir bólusetningar og umsóknir um þjónustu eða réttindi tengd heilbrigðisþjónustu. Aðgangur umboðshafa mun ekki ná yfir upplýsingar beint úr sjúkraskrá einstaklings og lyfjasaga einstaklings mun takmarkast við ákveðið tímabil, þ.e. 12 mánuði aftur í tímann eftir að umboð tekur gildi.