Frumvarp þetta mælir fyrir um breytingar á lögum vegna flutnings fasteignaskrár frá Þjóðskrá Íslands til Húsnæðis- og mannvirkjastofnunar. Tilfærslan hefur og fyrst og fremst þann tilgang að þjónusta á vegum hins opinbera á sviði húsnæðismála verður aukin og samhæfð, ásamt því sem breytingin veitir stjórnvöldum aukna yfirsýn til að gera markvissari aðgerðir til að ná jafnvægi á húsnæðismarkaði. Þjóðskrá Íslands mun áfram veita öfluga þjónustu við skráningu einstaklinga í grunnskrám landsins og veitir breytingin jafnframt tækifæri til að skilgreina framtíðarsýn Þjóðskrár með skýrum hætti og með skýrum skilum á milli stofnananna. Í frumvarpinu eru lagðar til breytingar á lögum um skráningu og mat fasteigna nr. 6/2001, lögum um Þjóðskrá Íslands nr. 70/2018 og lögum um Húsnæðis- og mannvirkjastofnun nr. 137/2019, í þeim tilgangi að færa ábyrgð á fasteignaskrá frá Þjóðskrá Íslands til Húsnæðis- og mannvirkjastofnunar. Er hér aðallega um orðalagsbreytingar að ræða auk þess sem lagt er til að í lögum um Húsnæðis- og mannvirkjastofnun verði verkefni tengd skráningu og mati fasteigna tilgreind.