Um reikisímtöl í farsíma gildir sú meginregla að ekki skuli lögð á aukin gjöld vegna notkunar á venjulegum ferðalögum innan EES (e. roam like home). Fjarskiptafyrirtæki geta samkvæmt EES-reglum lagt álag á einingarverð reikisímtala vegna þeirra símtala sem eru umfram eðlilega notkun (e. fair use policy). Árlega ákvarðar framkvæmdastjórn ESB hámark slíkrar álagningar (hámarksálag), á nánar skilgreindum reikniforsendum og að fenginni umsögn frá evrópskum hópi eftirlitsaðila á sviði fjarskipta (BEREC).

Samkvæmt framkvæmdarreglugerð framkvæmdastjórnarinnar (ESB) 2021/2228 frá 14. desember 2021, um vegið meðaltal hæsta verðs fyrir lúkningu símtala í farsíma í Sambandinu og um niðurfellingu á framkvæmdarreglugerð framkvæmdastjórnarinnar (ESB) 2020/2082, er hámarksálag á einingarverð reikisímtala vegna símtala sem eru umfram eðlilega notkun árið 2022 0,0072 evrur fyrir hverja mínútu (lækkun um 0,0004 evrur frá fyrra ári).

Framkvæmdarreglugerð 2021/2228 var tekin upp í EES-samninginn með ákvörðun sameiginlegu EES-nefndarinnar nr. 152/2022 hinn 29. apríl sl. Fyrirhugað er að innleiða hana hér á landi með breytingum á reglugerð nr. 1174/2012, um alþjóðlegt reiki á almennum farsímanetum innan Evrópska efnahagssvæðisins m.áo.br., með vísan til reglugerðardraganna sem hér með eru birt til umsagnar. Felld verði úr gildi breytingareglugerð nr. 601/2021, sama efnis.