Tímalína máls

1

Til umsagnar

  • 6.–27.7.2022

2

Í vinnslu

  • 28.7.2022–

Samráði lokið

Skjöl til samráðs

Mál nr. S-115/2022

Birt: 6.7.2022

Fjöldi umsagna: 9

Drög að frumvarpi til laga

Innviðaráðuneytið

Samgöngu- og fjarskiptamál

Frumvarp til laga um leigubifreiðaakstur

Málsefni

Innviðaráðuneytið birtir til umsagnar drög að frumvarpi til laga um leigubifreiðar. Markmiðið með frumvarpinu er að tryggja gott aðgengi að hagkvæmri, skilvirkri og öruggri leigubifreiðaþjónustu.

Nánari upplýsingar

Innviðaráðuneytið birtir hér til kynningar og samráðs drög að frumvarpi til nýrra laga um leigubifreiðar. Er að meginstefnu til um sama frumvarp að ræða og lagt hefur verið fram á Alþingi á 150., 151. og 152. löggjafarþingi, en ekki náð fram að ganga. Til stendur að leggja það fram að nýju í haust á 153. löggjafarþingi með þeim breytingum sem lagðar voru til í nefndaráliti umhverfis- og samgöngunefndar Alþingis á 152. löggjafarþingi (þskj. 1285, 470. mál).

Eitt megintilefni frumvarpsins er að í janúar 2017 tilkynnti Eftirlitsstofnun EFTA (ESA) íslenskum stjórnvöldum að stofnunin hefði hafið frumkvæðisathugun á leigubifreiðamarkaðnum á Íslandi og mögulegum hindrunum á aðgengi að honum. ESA hefur nú gefið út rökstutt álit varðandi lög um leigubifreiðar hér á landi. Slíkt álit er undanfari dómsmáls fyrir EFTA dómstólnum, bregðist aðildarríki ekki við álitinu. Í álitinu komst ESA að þeirri niðurstöðu að íslenska ríkið bryti gegn skyldum sínum skv. 31. gr. EES-samningsins, sem kveður á um stofnsetningarrétt ríkisborgara EES-ríkja þar sem eftirfarandi reglur gildandi laga fælu í sér ólögmæta takmörkun á stofnsetningarréttinum: fyrir fram ákveðinn fjöldi atvinnuleyfa, reglur um úthlutun starfsleyfa sem ekki eru fyrirsjáanlegar, hlutlægar og lausar við mismunun, skylda sumra leyfishafa til að hafa afgreiðslu á leigubifreiðastöð og krafa um að leigubifreiðastjórar hafi starfið að aðalatvinnu.

Frumvarpið telur 24 greinar sem skipt er í fimm kafla. Í fyrsta kafla eru almenn ákvæði, annar kafli inniheldur ákvæði um leyfisveitingar og skilyrði leyfa, í þriðja kafla eru ákvæði sem snúa að rekstri leigubifreiða, í fjórða kafla eru ákvæði um eftirlit með starfseminni og í fimmta kafla ýmis önnur nauðsynleg ákvæði svo sem um gildistöku og lagaskil, gjaldskrárheimildir Samgöngustofu o.fl.

Meðal breytinga sem lagðar eru til eru afnám takmörkunarsvæða og fjöldatakmarkana atvinnuleyfa, lögð er til almenn skylda leigubifreiða til að hafa afgreiðslu á leigubifreiðastöð og breyttar kröfur til þeirra sem hyggjast starfa sem leigubifreiðastjórar. Í frumvarpinu er gert ráð fyrir því að til verði tvær tegundir leyfa sem tengjast akstri leigubifreiða. Annars vegar atvinnuleyfi, sem veiti réttindi til að aka leigubifreið í eigu rekstrarleyfishafa í atvinnuskyni, og hins vegar rekstrarleyfi, sem veiti réttindi til að reka eina eða fleiri leigubifreiðar sem eru í eigu rekstrarleyfishafa eða skráð undir umráðum hans og aka henni í atvinnuskyni. Gert er ráð fyrir að rekstrarleyfi megi veita hvort heldur sem er lögaðila eða einstaklingi.

Gerðar eru breytingar á skilyrðum heimildar til rekstrar leigubifreiðastöðvar og þá verður rekstrarleyfishöfum heimilað að framselja hluta af skyldum sínum með samningi til leigubifreiðastöðvar.

Gert er ráð fyrir því að heimilt verði að aka án gjaldmælis í þeim tilfellum þegar samið hefur verið fyrir fram um áætlað eða endanlegt heildarverð fyrir ekna ferð. Þá er gert ráð fyrir því að gera megi ólíkar kröfur til merkinga bifreiða eftir því hvort þær séu búnar gjaldmæli eða ekki.

Frestur til að skila inn umsögnum er til 27. júlí 2022 en umsagnir verða birtar jafnóðum í samráðsgáttinni.

Í vinnslu

Umsagnir voru birtar jafnóðum og þær bárust. Skoða umsagnir.

Umsjónaraðili

Skrifstofa samgangna

irn@irn.is