Áform um lagasetningu snúa að því að leggja til ákvæði til bráðabirgða í lög nr. 116/2006, um stjórn fiskveiða, þannig að þeim smábátum eða minni fiskiskipum sem knúin eru eingöngu rafmagni verði heimilt að sækja um að landa 750 kg, í þorskígildum talið, af kvótabundnum tegundum í hverri veiðiferð á strandveiðum á fiskveiðiárinu 2022/2023 í stað 650 kg í hverri veiðiferð. Þannig gætu eigendur smábáta eða minni fiskiskipa séð hvata til þess að fjárfesta í nýjum bátum eða skipum eða gera breytingar á bátum og skipum sínum þannig að þau gangi fyrir rafmagni með drifrafhlöðum í stað jarðefnaeldsneytis. Frumvarpið fellur vel að meginmarkmiðum málefnasviðs sjávarútvegs um sjálfbæra auðlindanýtingu, verðmætasköpun og kolefnishlutleysi.