Samkvæmt gildandi lögum er gert ráð fyrir að ráðherra sé heimilt að ákveða í reglugerð að greiddar séu desemberuppbætur til þeirra sem teljast tryggðir samkvæmt lögunum að fengnu samþykki ríkisstjórnar hverju sinni. Á undanförnum árum hafa slíkar reglugerðir verið birtar ár hvert þar sem kveðið hefur verið á um greiðslu desemberuppbóta til þeirra sem teljast tryggðir samkvæmt lögunum. Reglugerðirnar hafa verið settar samkvæmt heimild í 3. mgr. 33. gr. laganna en í lokamálslið ákvæðisins kemur fram að ráðherra sé „heimilt að ákveða í reglugerð, að fengnu samþykki ríkisstjórnarinnar, að greiddar séu sérstakar desemberuppbætur á grunnatvinnuleysisbætur í lok hvers árs að uppfylltum nánar tilteknum skilyrðum.“

Með frumvarpi þessu er lagt til að í lögunum verði skýrt kveðið á um að greiða skuli desemberuppbætur á grunnatvinnuleysisbætur þannig að ekki leiki vafi á að slíkar uppbætur verði greiddar á ári hverju, enda séu tiltekin skilyrði uppfyllt, en gert er ráð fyrir að ráðherra setji reglugerð með nánari skilyrðum.