Hinn 17. maí 2022 skipaði ráðherra starfshóp sem var falið að greina rekstur Landgræðslunnar og Skógræktarinnar, eignaumsýslu, samlegð faglegra málefna stofnananna og vinna áhættugreiningu vegna mögulegrar sameiningar og skilaði starfshópurinn meðfylgjandi skýrslu þann 3. október sl. Niðurstaða starfshópsins er að fagleg og rekstrarleg rök eru fyrir sameiningu Landgræðslunnar og Skógræktarinnar og með góðum undirbúningi má tryggja að slík sameining skili í heildina meiri ávinningi en ef áfram verða tvær stofnanir. Tækifæri eru til staðar og horfa má til þess að ná fram aukinni skilvirkni í málaflokknum. Stærstu tækifærin snúa að heildstæðari sýn á landnýtingu sem geta flýtt framgangi fjölmargra verkefna m.a. í þágu loftslagsmála. Með vísan til framangreinds hefur matvælaráðherra ákveðið að leggja til að Landgræðslan og Skógræktin verði sameinaðar í nýja stofnun. Mikill samhljómur er með hlutverkum stofnananna eins og þau eru skilgreind í lögum nr. 155/2018 um landgræðslu og lögum nr. 33/2019 um skóga og skógrækt og nýverið gaf matvælaráðherra út fyrstu sameinuðu stefnuna í landgræðslu og skógrækt auk aðgerðaráætlunar.