Tímalína máls

1

Til umsagnar

  • 16.11.–16.12.2022

2

Í vinnslu

  • 17.12.2022–28.2.2023

3

Samráði lokið

  • 1.3.2023

Skjöl til samráðs

Mál nr. S-221/2022

Birt: 16.11.2022

Fjöldi umsagna: 29

Drög að reglugerð

Matvælaráðuneytið

Sjávarútvegur og fiskeldi

Drög að reglugerð um verndarráðstafanir vegna viðkvæmra hafsvæða og botnvistkerfa

Niðurstöður

Ráðuneytið hefur yfirfarið umsagnir og gert breytingar á drögunum eftir samráð innan ráðuneytisins og við Hafrannsóknarstofnun. Var reglugerðin gefin út með breytingum. Ráðuneytið þakkar innsendar umsagnir og telur að þær hafi gert drögin betri. Sjá meðfylgjandi skjal.

Málsefni

Matvælaráðuneytið kynnir til samráðs drög að reglugerð um verndarráðstafanir vegna viðkvæmra hafsvæða og botnvistkerfa.

Nánari upplýsingar

Í október 2021 skilaði Hafrannsóknastofnun skýrslu til ráðuneytisins um verndun viðkvæmra botnvistkerfa. Markmið skýrslunnar var að gefa yfirlit um þau svæði þar sem viðkvæm botnvistkerfi finnast, hvað vitað sé um þau, hvar skorti þekkingu og hvaða rök geti staðið til að loka þessum svæðum með varanlegri hætti eða á öðrum forsendum en nú er gert. Einnig fjallar skýrslan um einkennistegundir viðkvæmra vistkerfa og hvenær þéttleiki þeirra sé slíkur að svæði teljist innihalda viðkvæm vistkerfi.

Drög að reglugerð um verndarráðstafanir vegna viðkvæmra hafsvæða og botnvistkerfa eru nú kynnt í samráðsgátt. Ætlunin er að í einni og sömu reglugerð verði sameinuð ákvæði um verndun viðkvæmra vistkerfa á hafsbotni fyrir botnveiðum. Í reglugerðinni eru þrjú ný svæði til verndunar viðkvæmra botnvistkerfa á hafsbotni, þar sem botnveiðar verða óheimilar. Þá hafa verið færð inn í reglugerðina fimm svæði þar sem allar veiðar með línu og/eða fiskibotnvörpu hafa verið óheimilar, en þau svæði eru nú í reglugerð um friðunarsvæði við Ísland og hafa flest verið lokuð fyrir fyrrgreindum veiðum mjög lengi eða allt frá árinu 1971. Einnig hafa tíu svæði til verndunar kóralla verið færð inn í reglugerðina, en þar hafa botnveiðar verið óheimilar í hluta þeirra í tæp tuttugu ár. Alls er í drögunum lagt til að allar botnveiðar verði bannaðar á átján svæðum. Á þessum svæðum verða því eingöngu leyfðar veiðar á uppsjávarfiski með flotvörpu og hringnót. Svæðin sem hér um ræðir munu taka til tæplega 2% af efnahagslögsögu Íslands.

Meðfylgjandi er skýrsla Hafrannsóknastofnunar og kort af svæðunum.

Samráði lokið

Umsagnir voru birtar jafnóðum og þær bárust. Skoða umsagnir.

Umsjónaraðili

Skrifstofa sjálfbærni

mar@mar.is