Samráð fyrirhugað 19.01.2023—02.02.2023
Til umsagnar 19.01.2023—02.02.2023
Niðurstöður í vinnslu frá 02.02.2023
Niðurstöður birtar

Afnám banns við heimabruggun á áfengi til einkaneyslu

Mál nr. 10/2023 Birt: 19.01.2023
  • Dómsmálaráðuneytið
  • Áform um lagasetningu
  • Málefnasvið:
  • Almanna- og réttaröryggi

Til umsagnar

Umsagnarfrestur er 19.01.2023–02.02.2023. Umsagnir verða birtar jafnóðum og þær berast.
Senda inn umsögn

Málsefni

Áformað er að leggja fram frumvarp til breytinga á áfengislögum nr. 75/1998. Breytingarnar munu fela í sér afnám á banni við framleiðslu áfengis til einkaneyslu með gerjun (heimabrugg).

Með frumvarpi til breytinga á áfengislögum er ráðgert að afnema bann við heimabruggun á áfengi til einkaneyslu. Þó er gert ráð fyrir því að áfram verði óheimilt að framleiða áfengi til einkaneyslu með eimingu, en það er m.a. til samræmis við löggjöf á Norðurlöndunum. Þá verður einnig áfram óheimilt að stunda heimabruggun í því skyni að selja afurðina, enda er þá um atvinnustarfsemi að ræða sem er leyfisskyld samkvæmt lögum og reglum þar að lútandi.

Á undanförnum árum hefur orðið til rík menning heimabruggunar, þá sérstaklega á bjór, samhliða vexti handverksbrugghúsa sem hafa hafið starfsemi sína um land allt. Félög hafa verið stofnuð utan um heimabruggun áfengis til einkaneyslu, námskeið um slíka bruggun verið auglýst opinberlega og almenn umræða átt sér stað fyrir opnum tjöldum um athæfið. Almenningur virðist lítt upplýstur um að heimabruggun áfengis til einkaneyslu feli í sér refsiverðan verknað, sem bendir til þess að réttarvitund almennings kunni að vera á skjön við hið lögfesta og fortakslausa bann í 4. gr. áfengislaga. Því er talið tímabært að taka til skoðunar hvort enn séu rök fyrir því að skilgreina heimabruggun sem refsiverða háttsemi samkvæmt lögum.

Ekki er talið að áform þessi um lagabreytingar séu andstæð þeirri stefnu sem ríkt hefur um áfengismálefni hér á landi. Sem fyrr segir þá er heimabruggun áfengis víða stunduð á Íslandi þrátt fyrir gildandi bann og því ófyrirséð hvort heimabruggun muni aukast verði bannið afnumið. Umrætt bann virðist því hafa takmörkuð varnaðaráhrif í dag.

Viltu senda inn umsögn um málið?

Smelltu hér til að skrá þig inn með Íslykli eða rafrænni auðkenningu.

Ef umsögnin er send fyrir hönd samtaka, fyrirtækis eða stofnunar þarf umboð þaðan, sjá nánar hér.