Í apríl 2022 skipaði innviðaráðherra starfshóp um úrbætur á brunavörnum í húsnæði þar sem fólk hefur búsetu. Hópurinn var annar tveggja starfshópa sem skipaðir voru til að útfæra og fylgja eftir tillögum úr skýrslu samráðsvettvangs um úrbætur á brunavörnum, sem gerð var í kjölfar brunans á Bræðraborgarstíg 1.

Var starfshópnum falið að meta fjórar tillögur úr skýrslu samráðsvettvangsins, nr. 6, 9, 11 og 12. Starfshópurinn leggur til fræðsluátak varðandi eina tillögu en laga- og reglugerðarbreytingar varðandi hinar þrjár. Telur hópurinn æskilegt að kalla eftir samráði varðandi mögulega útfærslu á laga- og reglugerðarbreytingum. Verður samráðið í kjölfarið nýtt í lokaskýrslu og tillagna hópsins til ráðherra. Fyrirhuguð skil eru í sumarbyrjun.