Samráðsvettvangurinn Sjálfbært Ísland hefur ritað skýrslu um stöðu Íslands gagnvart heimsmarkmiðum Sameinuðu þjóðanna um sjálfbæra þróun. Skýrslunni verður skilað til Sameinuðu þjóðanna í júní sem hluta af landsrýni Íslands á heimsmarkmiðunum og niðurstöður hennar verða svo kynntar á ráðherrafundi Sameinuðu þjóðanna um sjálfbæra þróun í júlí. Endanleg útgáfa skýrslunnar mun taka mið af þeim athugasemdum sem berast í gegnum samráðsgáttina.

Í skýrslunni er fjallað um innleiðingu á heimsmarkmiðunum þvert á landið á innlendum sem og á erlendum vettvangi. Skýrslan tekur bæði mið af stöðumati stjórnvalda hvað varðar framgang að markmiðunum en einnig, í fyrsta sinn, stöðumati frjálsra félagasamtaka á Íslandi. Skýrslan byggir á víðtæku samráði og samstarfi en ýmsir hagaðilar skrifuðu sína eigin kafla í skýrsluna, svo sem ungmennaráð heimsmarkmiða Sameinuðu þjóðanna, ungmennafulltrúi Íslands hjá Sameinuðu þjóðunum á sviði sjálfbærrar þróunar f.h. Landsambands ungmennafélaga (LUF) og Samband íslenskra sveitafélaga. Skýrslan ávarpar þær áskoranir og tækifæri sem Ísland stendur frammi fyrir og í því samhengi samdi forsætisráðuneytið við Sjálfbærnistofnun Háskóla Íslands um gerð úttektar á svokölluðum smitáhrifum Íslands, eða þeim áhrifum sem aðgerðir innalands hafa á getu annarra landa til þess að ná heimsmarkmiðunum. Meginniðurstöður úttektarinnar eru að finna í skýrslunni.

Einnig er að finna kafla um innleiðingu markmiðanna í íslensku atvinnulífi, vitundarkannanir og verkfærakistur sem og heimsmarkmiðavinnu stjórnvalda innan- sem utan landsteinanna. Heimsmarkmiðin eru víðfem og ná yfir flest svið stjórnsýslunnar, bæði á ríkis- og sveitastjórnastigi. Jafnframt er innleiðing markmiðanna ekki einungis á hendi stjórnvalda heldur mun þurfa samhent átak margra hagsmunaaðila til þess að þau megi verða að veruleika. Hagstofa Íslands sér um að safna gögnum fyrir mælikvarða heimsmarkmiðanna og þar sem skýrslan í ár er frekar stutt og hnitmiðuð eru meiri upplýsingar að finna í gegnum gagnvirka hlekki.

Hægt er að senda inn umsögn um einstaka kafla skýrslunnar eða skýrsluna í heild. Athugið að umsagnir kunna að vera birtar í heild sinni í viðauka við skýrsluna þegar hún verður lögð fyrir Sameinuðu þjóðirnar í júlí. Þar sem skýrslunni þarf að skila á ensku er hún birt á því tungumáli hér en verður birt á íslensku haustið 2023. Umsagnir má þó, að sjálfsögðu, senda inn á íslensku.

Nánari upplýsingar um heimsmarkmiðin er að finna á heimsmarkmidin.is.