Við framkvæmd gildandi laga um útlendinga, sem voru samin á árunum 2014 til 2016 og öðluðust gildi 1. janúar 2017, hefur komið í ljós að lagfæra, endurskoða og breyta þarf nokkrum ákvæðum laganna um alþjóðlega vernd svo framkvæmd þeirra og málsmeðferð sé skilvirk og gagnsæ. Samhliða þeirri gríðarlegu fjölgun umsókna um alþjóðlega vernd sem íslenskum stjórnvöldum hefur borist undanfarin ár, auk sífelldrar breytingar á samsetningu umsækjenda, er mikilvægt að stjórnvöld geti brugðist við, eftir atvikum með laga- og reglugerðarbreytingum, og aðlagað verndarkerfið að þeirri þróun sem á sér stað á hverjum tíma. Verndarkerfið þarf að vera í stakk búið og byggt þannig upp að þeir sem raunverulega eiga rétt á alþjóðlegri vernd fái skjóta og mannúðlega afgreiðslu mála sinna. Frá gildistöku gildandi laga hafa verið gerðar breytingar á lögunum nokkrum sinnum og er frumvarp þetta áframhaldandi liður í nauðsynlegri endurskoðun þeirra.