Þann 25. júní 2020 varð bruni í Reykjavík þar sem þrír einstaklingar létust á voveiflegan hátt og þrír slösuðust. Sett var af stað umfangsmikið samráð af hálfu stjórnvalda sem leiddi það af sér að gefin var út skýrsla með 13 tillögum í mars árið 2021. Tillögurnar eru reifaðar í frumvarpinu sem fylgir hjálagt. Innviðaráðherra skipaði starfshóp þann 22. apríl árið 2022 með það að markmiði að skoða og fylgja eftir fjórum af tillögunum þrettán. Skýrslunni var skilað í júlí síðast liðnum.

Í frumvarpi þessu er lagt til að þeir sem eru skráðir án tilgreinds heimilisfangs og hafi fasta búsetu í atvinnuhúsnæði bjóðist að skrá sig með sérstakt aðsetur hjá Þjóðskrá Íslands. Þetta er gert í öryggisskyni svo slökkvilið og aðrir viðbragðsaðilar viti hverjir búi í atvinnuhúsnæði þegar vá ber að höndum. Aðsetri fylgir engin réttindi og er í engu sambærilegt við lögheimilisskráningu. Þannig er enginn hvati á bakvið skráningu annar en að tryggja öryggi íbúa. Hins vegar er að finna ákvæði sem leggja ábyrgð á eigendur atvinnuhúsnæðis til að hlutast til að skráning einstaklinga sem hafa fasta búsetu í húsnæði þeirra sé rétt.

Á móti kemur að í frumvarpinu er að finna ýmis önnur ákvæði sem efla brunavarnir og heimildir slökkviliðsins til eftirlitsins, svo sem heimild til inngöngu inn í húsnæði og heimild til beitingu stjórnvaldssekta svo dæmi séu nefnd.

Vegna þess hversu verkefnið er brýnt er kynning í samráðsgátt 10 dagar og eru umsagnaraðilar því hvattir til að kynna sér frumvarpið sem fyrst.