Samráðs gátt – opið samráð stjórnvalda við almenning

Reglugerð um viðurkenningu á menntun og starfsreynslu til starfa í löggiltri iðn hér á landi nr. 585/2011 var upphaflega sett til innleiðingar á tilskipun 2005/36/EB, en sú tilskipun fól að sínu leyti í sér sameiningu 15 eldri tilskipana sem giltu um lögvernduð störf í Evrópu.

Tilskipuninni var breytt með tilskipun 2013/55/ESB sem fól í sér ýmis nýmæli svo sem viðurkenningu á grundvelli sameiginlegra menntunarkrafna eða sameiginlegs lokaprófs, viðurkenningu á starfsþjálfunartíma nemenda og afmarkaða viðurkenningu til starfa. Einnig voru í tilskipuninni ítarleg ákvæði um upptöku hins svo kallaða Evrópska fagskírteinis (European Professional Card) sem innleitt hefur verið fyrir fimm starfsgreinar.

Haustið 2023 var ENIC-NARIC skrifstofunni, sem sinnir akademísku mati á erlendu námi, falið að taka við afgreiðslu umsókna um viðurkenningu faglegrar menntunar og starfsreynslu iðnaðarmanna samkvæmt reglugerð 585/2011, en Menntamálastofnun hafði sinnt því hlutverki frá árinu 2015.

Meðal þess sem ákveðið var í umræddri reglugerð þegar hún var sett 2011 var að heimilt væri að beita ákvæðum hennar við úrlausn umsókna er bárust frá aðilum sem koma frá löndum utan EES-svæðisins. Byggðist sú ákvörðun á fenginni reynslu af afgreiðslu slíkra umsókna og á því sjónarmiði að ekki væri talin sérstök þörf á að beita sértækum aðferðum við mat og afgreiðslu þeirra. Styðjast mætti við sömu grundvallarviðmið, enda þótt skýr munur væri á stöðu slíkra umsókna gagnvart umsóknum frá EES-ríkjum.

Í seinni tíð hefur vaknað grunur um að umsóknir sem berast frá löndum utan EES uppfylli ekki skilyrði um áreiðanleika og sérstök þörf sé á að viðhafa ríkari aðgreiningu þegar kemur að úrvinnslu þeirra. Með breytingu á reglugerðinni er lagt til að heimilt verði að kalla eftir frumriti prófskírteinis í tilvikum þegar vafi leikur á um áreiðanleika innsendra gagna.

Með hliðsjón af öllu framan sögðu er talin þörf á að endurskoða reglugerð nr. 585/2011 um viðurkenningu á menntun og starfsreynslu iðnaðarmanna og birtast drög að þeirri reglugerð hér á Samráðsgátt.