Í 12. gr. reglugerðar um fjárhagsleg viðmið og eftirlit með fjármálum sveitarfélaga, nr. 502/2012, er kveðið á um að ef heildarútgjöld allra veitu- og/eða orkufyrirtækja sem færð eru í B-hluta sveitarfélags séu umfram 15% af heildarútgjöldum A- og B-hluta eða ef heildarskuldir og skuldbindingar eru umfram 30% af heildarskuldum og skuldbindingum skuli undanskilja reikningsskil viðkomandi veitu- og/eða orkufyrirtækja frá útreikningum á jafnvægisreglu og skuldaviðmiði.

Þetta er í ósamræmi við ákvæði bráðabirgðaákvæðis III við sveitarstjórnarlög, nr. 138/2011, þar sem segir að skylt sé við útreikning á afkomu og fjárhagsstöðu að undanskilja tekjur, útgjöld, eignir, skuldir og skuldbindingar sem hljótast af eignarhlutum sveitarfélags í veitu- og orkufyrirtækjum í allt að tíu ár frá gildistöku laganna, óski sveitarfélagið þess, enda verði það fyrir umtalsvert meiri útgjöldum og/eða beri umtalsvert meiri skuldir en annars væri vegna eignarhlutanna. Regla laganna er m.ö.o. valkvæð og tímabundin til ársins 2022. Lagt er því til að ákvæði laganna verði tekið upp í reglugerðina í stað núverandi ákvæðis.

Í öðru lagi er lögð til breyting á orðalagi 3. tölul. 2. mgr. 14. gr. reglugerðarinnar þar sem skilgreint er hvernig fara skuli með hreint veltufé við útreikning á skuldaviðmiði. Er hið nýja orðalag talið skýrara að mati reikningsskila- og upplýsingarnefndar sveitarfélaga.