Í drögunum eru lagðar til breytingar á 5. gr. reglugerðarinnar sem fjallar um stjórnvald hafnaverndar. Breytingarnar sem lagðar eru til fela í sér að Samgöngustofa skuli tilnefna stjórnvald hafnaverndar fyrir hverja höfn og það stjórnvald skuli vera ábyrgt fyrir gerð og framkvæmd verndaráætlana hafna byggðum á niðurstöðum áhættumats fyrir hverja höfn.

Í gildandi reglugerð segir að eigendur hafnar skuli fela hafnarstjórn að fara með stjórn og ábyrgð hafnaverndar en verndarfulltrúi hafnar fari með daglega stjórn og framkvæmd hafnaverndar. Þá skuli hafnarstjórn viðkomandi hafnar vera ábyrg fyrir gerð og framkvæmd áhættumats og verndaráætlunar hafnar.

Breytingarnar sem lagðar eru til þykja gæta betra samræmis við orðalag 5. gr. tilskipunar evrópuþingsins og ráðsins 2005/65/EB frá 26. október 2005 um að efla hafnavernd sem kveður á um að aðildarríki skuli tilnefna stjórnvald hafnaverndar. Þannig eru breytingarnar til þess fallnar að reglugerðin stuðli betur að því að íslenska ríkið uppfylli alþjóðlegar skuldbindingar sínar samkvæmt tilskipuninni.

Breytingarnar sem lagðar eru til hafa ekki í för með sér breytingar á framkvæmd siglingaverndar, en í dag er framkvæmdin í samræmi við þær breytingar sem lagðar eru til.