Skipaður hefur verið vinnuhópur með fulltrúum dómsmálaráðuneytisins, mennta- og menningarmálaráðuneytisins, velferðarráðuneytisins, samgöngu- og sveitarstjórnarráðuneytisins og utanríkisráðuneytisins, sem hefur það hlutverk að skrifa skýrslu íslenska ríkisins um framkvæmd samnings Sameinuðu þjóðanna um réttindi barnsins (barnasáttmálann). Síðasta skýrsla Íslands var skrifuð árið 2008, en hún var tekin fyrir af nefnd Sameinuðu þjóðanna um réttindi barnsins árið 2011.

Við gerð skýrslunnar mun vinnuhópurinn hafa víðtækt samráð bæði við börn og þá sem vinna að réttinda- og hagsmunamálum barna. Er því hér með óskað eftir ábendingum og tillögum um þau atriði sem leggja skal áherslu á í skýrslunni.

Einnig verður haldinn opinn samráðsfundur um málið mánudaginn 14. maí nk. milli kl. 14 og 16 í atvinnuvega- og nýsköpunarráðuneytinu. Þau sem hyggjast sækja fundinn eru vinsamlegast beðin um að skrá sig með því að senda tölvupóst á netfangið mannrettindi@dmr.is eigi síðar en föstudaginn 11. maí kl. 12.