Unnið er að gerð stefnumótandi samgönguáætlunar 2019-2033. Samgönguáætlun skal meta á grundvelli laga um umhverfismat áætlana og er samkvæmt 12. gr. skipulagslaga skipulagsskyld. Í matslýsingunni, sem nú er kynnt, er gerð grein fyrir því með hvaða hætti umhverfismat samgönguáætlunar verður unnið og hvaða þættir verða lagðir til grundvallar. Markmið umhverfismatsins er að stuðla að sjálfbærri þróun og draga úr neikvæðum umhverfisáhrifum samgangna, jafnframt því að stuðla að því að tekið verði tillit til umhverfissjónarmiða við mótun samgöngustefnu. Samgöngu- og sveitarstjórnarráðuneytið mun í kjölfarið taka saman yfirlit um athugasemdir og ábendingar sem berast og hvernig þær muni nýtast við gerð umhverfisskýrslu.