Áformuðu frumvarpi er ætlað að tryggja lagastoð til innleiðingar á Reglugerð Evrópuþingsins og ráðsins (ESB) 2020/1055 frá 15. júlí 2020 um breytingu á reglugerðum (EB) nr. 1071/2009, (EB) nr. 1072/2009 og (ESB) nr. 1024/2012 að því er varðar að aðlaga þær að þróun sem orðið hefur á sviði flutninga á vegum. Einnig er til skoðunar hvort tilefni séu til að gera breytingar til einföldunar á leyfafyrirkomulagi skv. lögunum.

Gildissvið laga nr. 28/2017 er ekki í fullu samræmi við reglugerð Evrópuþingsins og ráðsins (ESB) 2020/1055 sem til stendur að innleiða hér á landi. Þannig gilda lög nr. 28/2017, um farmflutninga með vélknúnum ökutækjum eða samtengdum ökutækjum þar sem leyfð heildarþyngd fer yfir 3,5 tonn og leyfilegur hámarkshraði ökutækjanna er 45 km á klst. eða meiri. Vegna þeirra breytinga sem felast í reglugerð (ESB) 2020/1055 er nauðsynlegt að útvíkka gildissvið laganna svo þau taki einnig til farmflutninga milli ríkja þegar leyfð heildarþyngd fer yfir 2,5 tonn.